ოკუპირებული აფხაზეთის ე.წ. პრეზიდენტი ასლან ბჟანია თანამდებობიდან გადადგა. პოსტი დატოვა ე.წ. პრემიერ-მინისტრმა ალექსანდრე ანქვაბმაც. ამის შესახებ „ეხო კავკაზა“ იუწყება.
„ქვეყანაში სტაბილურობისა და კონსტიტუციური წესრიგის შესანარჩუნებლად, აფხაზეთის კონსტიტუციის 65-ე მუხლის შესაბამისად, ვტოვებ აფხაზეთის რესპუბლიკის პრეზიდენტის თანამდებობას“, – აღნიშნულია ბჟანიას მიერ ხელმოწერილ დოკუმენტში, რომელიც დე ფაქტო ხელისუფლებასა და ოპოზიციას შორის ხანგრძლივი მოლაპარაკებების შემდეგ გამოქვეყნდა.
მხარეების მიერ ხელმოწერილი შეთანხმების თანახმად, ბჟანია გადადგომის განცხადებას წარადგენს, ხოლო დე ფაქტო მთავრობის შენობების კომპლექსსა და მის მიმდებარე ტერიტორიაზე შეკრებილი მოქალაქეები 19 ნოემბერს დაიშლებიან. „ამ პუნქტის შეუსრულებლობის შემთხვევაში, აფხაზეთის რესპუბლიკის პრეზიდენტი ასლან ბჟანია უკან გაიწვევს გადადგომის განცხადებას“.
სამშაბათს, აფხაზეთის ე.წ. პარლამენტი ბჟანიას გადადგომის განცხადებას განიხილავს. ე.წ. პრეზიდენტის მოვალეობებს შეასრულებს დე ფაქტო ვიცე-პრეზიდენტი ბადრა გუნბა. ე.წ. პრემიერ-მინისტრის თანამდებობაზე დაინიშნება ყოფილი სპიკერი ვალერი ბგანბა. „მოქმედი მინისტრები თავიანთ მოვალეობებს შეასრულებენ ახალი არჩეული პრეზიდენტის უფლებამოსილების დაწყებამდე“, – აღნიშნულია დოკუმენტში.
ადრე ბჟანიამ განაცხადა, რომ კვლავ აპირებს დე ფაქტო პრეზიდენტის არჩევნებში მონაწილეობას.
ცნობისთვის, სოხუმში 15 ნოემბერს ე.წ. პარლამენტის მიერ რუსეთთან „საინვესტიციო შეთანხმების“ განხილვის დროს მომიტინგეები დე ფაქტო პარლამენტის და ე.წ. პრეზიდენტის ადმინისტრაციის შენობაში შეიჭრნენ. ისინი იქ ამ დრომდე იმყოფებიან და დატოვებას არ გეგმავენ. იმ დღესვე ოპოზიციის წარმომადგენლებმა განაცხადეს, რომ ასლან ბჟანია თანამდებობიდან გადაყენებულია და მასთან ხელისუფლების გადაბარებაზე და რიგგარეშე საპრეზიდენტო არჩევნებთან დაკავშირებით მოლაპარაკება უნდა გაიმართოს.