„თქვენ არ შეგიძლიათ მოატყუოთ ქვეყანა, რომელიც თავისი მომავლისთვის იბრძვის“ – ორბანი ევროკავშირს უკრაინისთვის „შეუძლებელი დაპირებების“ მიცემაში ადანაშაულებს

უნგრეთის პრემიერ-მინისტრმა ვიქტორ ორბანმა ევროკავშირის ხელმძღვანელობა უკრაინისთვის ევროკავშირში გაწევრიანების სურვილთან დაკავშირებით „შეუძლებელი დაპირებების“ მიცემაში დაადანაშაულა. ამის შესახებ ორბანმა Kossuth რადიოს ეთერში განაცხადა.

ორბანმა კიდევ ერთხელ გაიმეორა თავისი არგუმენტები უკრაინის ევროკავშირში გაწევრიანების წინააღმდეგ, კერძოდ, მისი თქმით, უკრაინის ევროკავშირში მიღებით ევროკავშირი „ასევე, იღებს ომს“ და რომ ომისა და არასტაბილური ფრონტის პირობებში, სავარაუდოდ, გაურკვეველია, რა არის უკრაინის საზღვრები და მისი მოსახლეობა.

„სად არის მისი საზღვრები? მოსახლეობა გაიქცა. არ ვიცით, რამდენია და რამდენი იქნება“, – განაცხადა უნგრეთის პრემიერ-მინისტრმა.

მან კიდევ ერთხელ გაიმეორა თავისი მოსაზრება, რომ უკრაინა ევროკავშირში გაწევრიანებამდე ნატოს წევრი უნდა გამხდარიყო, როგორც ეს ცენტრალური და აღმოსავლეთ ევროპის სხვა ქვეყნების შემთხვევაში მოხდა და ვინაიდან ეს „საშიშია, რადგან რუსეთს გააღიზიანებს“, მისი ევროკავშირში გაწევრიანება სამხედრო უსაფრთხოების გარანტიების გარეშე „შეუძლებელია“.

„ეს სიგიჟეა, ჩვენ გულწრფელები უნდა ვიყოთ. თქვენ არ შეგიძლიათ მოატყუოთ ქვეყანა, რომელიც თავისი მომავლისთვის იბრძვის. ბრიუსელის ხალხი კი ატყუებს, ატყუებს უკრაინელებს. ისინი მათ შეუძლებელ რამეს ჰპირდებიან“, – აღნიშნა ორბანმა.