რუსეთის პრეზიდენტმა ვლადიმირ პუტინმა გამოსცა ახალი ბრძანებულება, რომლის თანახმადაც მნიშვნელოვნად იზრდება სტიპენდიების რაოდენობა სამხედრო-სამრეწველო კომპლექსში მომუშავე ინოვაციური კადრებისთვის. დოკუმენტი გამოქვეყნდა რუსეთის სამართლებრივი აქტების ოფიციალურ პორტალზე და ის ცვლილებებს შეიტანს 2012 წლის ოქტომბრის დადგენილებაში.
სტიპენდიები გათვალისწინებულია მეცნიერებისთვის, ინჟინრებისთვის, დიზაინერებისა და ტექნოლოგებისთვის, რომლებიც ჩართული არიან სახელმწიფოს თავდაცვის შეკვეთებში და უშუალოდ მუშაობენ „გარღვევის ტექნოლოგიების“ შექმნაზე — პროექტებზე, რომლებიც თანამედროვე იარაღის შემუშავებას ემსახურება.
ბრძანებულებით, ამ კატეგორიის სპეციალისტებისთვის სტიპენდიების რაოდენობა 500-დან 650-მდე გაიზარდა, ხოლო თავდაცვის ინდუსტრიის საწარმოებში დასაქმებული სპეციალისტებისა და ახალგაზრდა (35 წლამდე ასაკის) კადრებისთვის — 1500-დან 1900-მდე. დოკუმენტში აღნიშნულია, რომ გადაწყვეტილება ძალაში შევა 2026 წლის 1 იანვრიდან.
ამ ნაბიჯს კრემლი სამხედრო-სამრეწველო კომპლექსის წახალისებისა და გრძელვადიანი გაძლიერების ინსტრუმენტად იყენებს. პუტინის აქცენტები ნათლად მიუთითებს, რომ რუსეთის სტრატეგიული პრიორიტეტი კვლავ სამხედრო ინდუსტრიის გაძლიერებაა, მაშინ როცა ქვეყნის ეკონომიკის სხვა სფეროები კრიზისის პირობებში იმყოფება.
მანამდე პრეზიდენტმა ასევე გაავრცელა მითითება დამატებითი ზომების შემუშავების შესახებ, რომელიც მიზნად ისახავს შიდა თავდაცვის სექტორის მხარდაჭერასა და განვითარების დაჩქარებას.