დანიის პრემიერ-მინისტრმა მეტე ფრედერიქსენმა 1960-იან წლებში გრენლანდიელი ქალების იძულებითი კონტრაცეფციის გამო ოფიციალურად ბოდიში მოიხადა.
„დანიის სახელით მსურს ბოდიში მოვუხადო ქალებს, რომლებსაც არასამართლიანად მოეპყრნენ და მათ სისტემატურ დისკრიმინაციას უწევდნენ. ეს შემთხვევა გრენლანდიის საზოგადოებაში ღია ჭრილობაა“, – განაცხადა ფრედერიქსენმა.
დანიის პრემიერთან ერთად ბოდიში გრენლანდიის მთავრობის თავმჯდომარემაც, იენს-ფრედერიკ ნილსნენმაც მოიხადა. „შეუძლებელია იმის შეცვლა, რაც მოხდა, მაგრამ პასუხისმგებლობის აღება საკუთარ თავზე შესაძლებელია“, – აღნიშნა მან.
1960-იან წლებში დანიაში დაიწყო კამპანია, რომლის ფარგლებშიც სულ მცირე 4 500 გრენლანდიელ გოგონას მათგან მალულად ჩასახვის საწინააღმდეგო სპირალი ჩაუდგეს.
იძულებითი კონტრაცეფციის მეშვეობით დანიას გრენლანდიის მოსახლეობის ზრდის შეჩერება სურდა. ამის გამო ბევრ ქალს ჯანმრთელობის სერიოზული პრობლემები შეექმნა – უშვილობა და ფსიქოლოგიური ტრავმები.
„სპირალის სკანდალის“ შესახებ ცნობილი 2022 წელს გახდა დანიის რადიოს გამოძიების წყალობით. 143 გრენლანდიელმა ქალმა კოლექტიური სარჩელით სასამართლოს მიმართა. ისინი დანიის მთავრობისგან კომპენსაციის სახით 6 მილიონ დოლარზე მეტს ითხოვენ.
დანია და გრენლანდია მომხდარს ერთობლივად იძიებენ. მოსალოდნელია, რომ საქმის სრული დასკვნა მიმდინარე წლის სექტემბერში გამოქვეყნდება.