კვირას გამოქვეყნებული გამოკითხვის თანახმად, საფრანგეთის პრეზიდენტის, ემანუელ მაკრონის რეიტინგმა ახალი ანტირეკორდი დაამყარა, მას შემდეგ, რაც ის 2017 წელს აირჩიეს.
გაზეთ Journal de Dimanche-ში გამოქვეყნებული Ifop-ის გამოკითხვის თანახმად, პრეზიდენტის მუშაობა დადებითად, მხოლოდ გამოკითხულთა 21%-მა შეაფასა.
მისი პოპულარობა კიდევ უფრო დაბალია, ვიდრე ეს იყო 2019 წელს „ყვითელი ჟილეტების“ მოძრაობასთან დაპირისპირების დროს, როდესაც ყოველკვირეული მაკრონის წინააღმდეგ გამართული პროტესტი წელიწადზე მეტი ხნის განმავლობაში გრძელდებოდა.
მაკრონის რეიტინგი ნოემბერში 22%-ს შეადგენდა, კვირას გამოქვეყნებული გამოკითხვის თანახმად კი, პრეზიდენტის რეიტინგი კიდევ უფრო შემცირდა, რაც ახალი ანტირეკორდია მისთვის.
გამოკითხულთა 35% პრეზიდენტის მუშაობით უკმაყოფილოა, 45% კი ძალიან უკმაყოფილოა. პრეზიდენტის მუშაობას დადებითად მხოლოდ 21% აფასებს.
რაც ყველაზე შემაშფოთებელია, დეკემბრის გამოკითხვის შემდეგ, მაკრონის პოპულარობა ხანდაზმულებსა და პენსიონერებს შორის 10%-ით შემცირდა. მაკრონისთვის ეს ყველაზე ცუდი მაჩვენებელია, რადგან მისი ამომრჩევლების დიდი ნაწილს, სწორედ ხანდაზმულები და პენსიონერები წარმოადგენენ.