რადიო „თავისუფლების“ ევროპის ბიუროს რედაქტორი, რიკარდ იოზვიაკი სოციალურ ქსელში X ნატოს სამიტის წინ გაკეთებული განცხადებები შეაფასა. მან აღნიშნა, რომ წინა სამიტებისგან განსხვავებით, წელს ალიანსში უკრაინის გაწევრიანებაზე არაფერი თქმულა.
„საინტერესოა, რომ ნატოს სამიტის წინ ჰააგაში გამართულ პრესკონფერენციაზე, როდესაც სიტყვით გამოვიდნენ ზელენსკი, რუტე, კოშტა და ფონ დერ ლაიენი, უკრაინის ალიანსში გაწევრიანება ერთხელაც არ უხსენებიათ. რადიკალურად განსხვავდება ვილნიუსის 2023 წლისა და ვაშინგტონის 2024 წლის სამიტებისგან“, – წერს იოზვიაკი.
ნიდერლანდების ქალაქ ჰააგაში ნატოს ორდღიანი სამიტი დღეს ოფიციალურად გაიხსნა. სამიტი 25 ივნისსაც გაგრძელდება. ღონისძიების დასრულების შემდეგ ნატოს გენმდივანი პრესკონფერენციას გამართავს.