ქალაქ ოდესაზე რუსული ძალების იერიშის შედეგად დაშავებული მშვიდობიანი მოქალაქეების რიცხვი 9-მდე გაიზარდა. ამის შესახებ ოდესის ოლქის სახელმწიფო ადმინისტრაციის ხელმძღვანელი ოლეგ კიპერი იტყობინება.
როგორც კიპერმა აღნიშნა, ოდესაზე შეტევა დილის 10:00 საათზე დაიწყო, როდესაც ბევრი მათგანი პლაჟზე ან სამსახურში იმყოფებოდა.
„ამჟამად ჩვენთვის ცნობილია ცხრა დაშავებულის შესახებ, რომელთაგან შვიდი საავადმყოფოში გადაიყვანეს, დანარჩენებს კი დახმარება ადგილზევე გაუწიეს. ყველა შესაბამისი სამსახური შედეგების აღმოსაფხვრელად მუშაობს“, – განაცხადა კიპერმა.
უკრაინული მედიის ინფორმაციით, რუსების იერიშის შედეგად დაზიანდა საცხოვრებელი შენობები, ბენზინგასამართი სადგური და რამდენიმე მანქანა. ადგილზე მაშველები, ექიმები და სამართალდამცველები მუშაობენ.
შეგახსენებთ, 11 ივლისს რუსულმა ძალებმა უკრაინას უპილოტო საფრენი აპარატებით კვლავ შეუტიეს.