სისხლის სამართლის საერთაშორისო სასამართლოს პროკურორმა კარიმ ხანმა ისრაელის პრემიერ-მინისტრ ბენიამინ ნეთანიაჰუსა და ქვეყნის თავდაცვის მინისტრის, იოავ გალანტის დაკავების ორდერების გამოცემის შუამდგომლობით სასამართლოს ქვედა პალატას მიმართა.
პროკურორის განცხადებაში ნათქვამია, რომ შეგროვებული მტკიცებულებების საფუძველზე, პროკურორებს საფუძველი აქვთ იფიქრონ, რომ ორივე მათგანი პასუხისმგებელია 2023 წლის 8 ოქტომბრიდან ღაზას სექტორში სამხედრო და კაცობრიობის წინააღმდეგ ჩადენილ დანაშაულებზე.
„ჩვენს მიერ შეგროვილი მტკიცებულებები, მათ შორის, ინტერვიუები გადარჩენილებთან და თვითმხილველებთან, აგრეთვე ფოტო, ვიდეო და აუდიომასალები, სატელიტური სურათები და სავარაუდო დამნაშავე ჯგუფის განცხადებები ცხადყოფს, რომ ისრაელი მიზანმიმართულად და სისტემატურად ართმევს ღაზას ყოველ კუთხეში მცხოვრებ სამოქალაქო პირებს გადასარჩენად აუცილებელ საშუალებებ“, – ნათქვამია განცხადებაში.
დოკუმენტის ხელმომწერები აგრეთვე ითხოვენ „ჰამასის“ სამი ლიდერის დაკავებას.
„ჩვენი მტკიცებით, ბრალდებები კაცობრიობის წინააღმდეგ ჩადენილი დანაშაულების შესახებ წარმოადგენდა ფართომასშტაბიანი და სისტემური თავდასხმების ნაწილს, „ჰამასისა“ და სხვა შეიარაღებული დაჯგუფებების მხრიდან ისრაელის მშვიდობიან მოსახლეობაზე ფართომასშტაბიან და სისტემურ თავდასხმებს. ჩვენი შეფასებით, ამ დანაშაულთაგან ზოგი, დღემდე გრძელდება“, – წერს პროკურორი თავისი ოფისის სახელით გავრცელებულ განცხადებაში.
როგორც განცხადებაშია ნათქვამი, ყველა ადამიანის სიცოცხლეს თანაბარი ღირებულება გააჩნია და აუცილებელია ვაჩვენოთ, რომ საერთაშორისო ჰუმანიტარული სამართალი ყველა ინდივიდზე ვრცელდება.
„ახლა, როგორც არასდროს, ჩვენ ერთობლივი ძალებით უნდა ვაჩვენოთ, რომ საერთაშორისო ჰუმანიტარული სამართალი, როგორც ადამიანის ქცევის ძირითადი საფუძველი კონფლიქტის დროს, ყველა ინდივიდზე ვრცელდება და თანაბრად ვრცელდება იმ სიტუაციებში, რომლებსაც ჩემი ოფისი და სასამართლო მიმართავენ. ამით ჩვენ ხელშესახებ დავამტკიცებთ, რომ ყველა ადამიანის სიცოცხლეს თანაბარი ღირებულება აქვს“, – ნათქვამია განცხადებაში.
შეგახსენებთ, გასული წლის 7 ოქტომბერს „ჰამასის“ წევრები ისრაელის ტერიტორიაზე შეიჭრნენ და ადგილზე 1200-ზე ადამიანი დახოცეს, 250 მოქალაქე კი ტყვედ ჩაიგდეს. ამას, ისრაელის მხრიდან ღაზას სექტორში სახმელეთო ოპერაციის დაწყება მოჰყვა, რამაც ჰუმანიტარული კატასტროფა და პალესტინელ მშვიდობიან მოსახლეობაში დიდი მსხვერპლი გამოიწვია, რასაც არაერთი საერთაშორისო ორგანიზაცია ადასტურებს.
